Día da Paz

No noso centro celebramos o día da Paz con moitas actividades: fixemos lectura de poemas e cantamos cancións sobre a paz, tamén houbo algunha representación teatral e por último fixemos unha solta de globos que levaban unha pomba cunha mensaxe. Agardabamos que chegara moi lonxe, pero aínda non tivemos resposta de ninguén. Velaí tedes algunhas fotos.

Unha noite na ópera

Onte, día 23 de febreiro, os alumnos/as de 5º fomos ver a película "Unha noite na ópera" ao Auditorio de Ourense. Foi unha película moi divertida, e, a pesar de ser en branco e negro, pasámolo de medo co humor dos irmáns Marx. Recomendámosvola.

portacastañas

Nesa semana todo o colexio participou nunha exposición de "portacastañas" que se instalou na entrada do colexio, e como podedes ver contaba con algúns ben orixinais. Se vos queredes animar para outro ano só vos fai falta un cartón de leite, zume... cortalo pola metade e decoralo como queirades. Claro que algúns botáronlle máis imaxinación e eles mesmos fixeron os moldes.

magosto 2010

O 10 de novembro celebramos no noso colexio o magosto. Despois de xantar todos no patio fixemos, mellor dito fixeron os profesores, as fogueiras para asar as castañas e aproveitar os tizóns para poñernos así de guapos. Velaí tedes unhas cantas fotos.

Novo curso con novos alumnos

Ola a todas/os.

Teño isto un pouco abandonado. Son varias as razóns: os nenos cos que comecei este blog xa promocionaron ao Instituto e agora estou con alumnos novos en 5º curso e entre coñecelos, coñecerme e outros líos co proxecto Abalar, no que andamos metidos este curso, pois o blog foise relegando a un segundo plano. A ver se pouco a pouco nos imos animando.

Día Internacional da Muller

Co gallo do Día Internacional da Muller estivemos buscando información sobre mulleres que destacaron en diferentes campos: científicas, políticas, artistas, escritoras…todas elas pioneiras na loita pola igualdade, e con eses datos elaboramos entre todos/as este mural que vos mostramos a continuación. Sabemos que hai moitas máis e pouco a pouco á árbore iranlle nacendo máis follas.

Encontro co escritor ANTONIO GARCÍA TEIJEIRO

O mércores, 27 de xaneiro tivemos un encontro co escritor Antonio García Teijeiro na aula de cultura de Caixanova. Alí xuntámonos os alumnos de 6º de varios colexios de Ourense. O escritor estivo durante unha hora léndonos algúns poemas do seu libro Bolboretas de papel e nós axudabámoslle a recitalos e dramatizalos. Xogaba moito coas palabras e fíxonos ver que a poesía pode ser divertida.

Nós xa leramos o libro na clase e pareceunos moi bonito e fácil. Despois puidemos facerlle algunhas preguntas e por último firmounos os libros a todos os nenos.

Ao saír dirixímonos todos á Praza Mayor e alí cantámoslle todos unha canción e un representante de cada clase leu un poema do seu libro. Ao final fíxose unha solta de globos.

A Praza estaba adornada coas bolboretas que decoramos cada un de nós na clase. Nas seguintes fotos podedes observar o bonitas que eran as que nós fixemos.